I Sakeus Dados Pengiring Hyang Yesus
19
Sasampune Hyang Yesus rauh ring Kota Yeriko,
Ida mamargi ngliwatin kotane punika,
kasarengin para sisian Idane.
2 Irika wenten pemimpin tukang nuduk jinah pajega sane sugih.
Ipun mapesengan I Sakeus.
3 I Sakeus punika meled nyingakin sirake Hyang Yesus punika.
Nanging ipun nenten ja mresidayang krana anake irika kalintang akeh turmaning I Sakeus punika endep.
4 Punika mawinan ipun malaib ngamalunin anake akeh punika raris mongkod punyan kayune mangda sida nyingakin Hyang Yesus sane jagi liwat irika.
5 Ritatkala Hyang Yesus rauh nampek ring punyan kayune punika,
Ida nyingakin I Sakeus ring punyan kayune saha ngandika sapuniki,
“Jero Sakeus,
gelisang ja tedun!
Krana mangkin Tiang musti singgah ka jeron jerone.”
6 Irika raris I Sakeus pramangkin tedun saking punyan kayune saha nyambut Hyang Yesus antuk manah sane girang.
7 Duk punika anake akeh sane nyaksiang paindikane punika pada pakrimik sapuniki,
“Beh!
Ia kemu sid umah anake ane madosa!”
8 Nanging I Sakeus ngadeg saha matur ring Hyang Yesus sapuniki,
“Duh Ratun titiang,
atenga saking artan titiange jagi pakidihang titiang ring anake tiwas;
tur sapa sira ja sane padayain titiang,
titiang jagi nguliang jinah anake punika kantos petang lipet!”
9 Raris Hyang Yesus ngandika sapuniki,
“Dinane mangkin,
anake puniki sareng sane meneng ring jeron ipune kaslametang krana ipun pada yakti sentanan dane Abrahamb.
10 Tiang,
Sang Putraning Manusac,
rauh mangda ngrereh lan nylametang anake sane inguh paling.”
Pengumpamian indik Jinah Emas
11 Duk punika akeh anake sane mirengin pengandikan Hyang Yesuse.
Irika Ida sampun nampek ring Kota Yerusalem,
tur anake akeh mapineh indik Sang Hyang Pengardi jagi pramangkin ngawitin mamrentah dados Raja irika.
Krana papineh anake punika iwang,
Hyang Yesus nyeritayang pengumpamian
12 sekadi puniki,
“Wenten anak agung sane lunga ka ibukota karajaan sane adoh,
jagi kalantik dados raja ring negerin idane.
Wusan kalantik ida jagi mawali malih.
13 Sadereng anak agunge punika luas,
ida ngamanggil dasa diri pengayah idane.
Raris ida ngicenin ipun suang-suang jinah emas paduma aketeng,
saha mabaos sapuniki,
‘Anggon ja modal madagang,
pipis emase ene kanti tiang mawali!’
14 “Nanging warga ring negerine irika nenten seneng kapining anake agung punika.
Tur wargane irika ngutus utusan kapining maharaja sane jagi nglantik anak agung punika mangda matur sapuniki:
‘Titiang sami nenten kayun anake puniki dados rajan titiange.’
15 “Nanging anake agung punika tetep kalantik dados raja,
raris ida mawali ka negerin idane.
Irika ida ngamanggil para pengayahe sane nerima jinah emas punika mangda uning amongken polih bati saking asil maadolan.
16 “Pengayahe sane kapertama tangkil ring anake agung punika saha matur sapuniki,
‘Duh ratu,
jinah emas asiki sane icen iratu sampun ngasilang dasa keteng jinah emas.’
17 “Raris anake agung punika mabaos sapuniki,
‘Melah sajan palaksanan awake,
wih pengayah ane satya!
Uli paundukan ane cenik awake satya,
keto mawinan awake bakal baang gelah nguasain dasa kota.’
18 “Raris tangkil pada pengayahe sane kaping kalih saha matur sapuniki,
‘Duh ratu,
jinah emas asiki sane icen iratu sampun ngasilang limang keteng jinah emas.’
19 “Raris anake agung punika mabaos sapuniki,
‘Awake bakal baang gelah nguasain limang kota.’
20 “Kenten pada tangkil pengayahe sane lianan saha matur sapuniki,
‘Duh ratu,
niki jinah emas sane icen iratu simpen titiang ring saputangane.
21 Krana titiang jejeh kapining iratu,
duaning iratu madue solah sane keras.
Iratu ngambil bati asil maadolan saking anak lianan,
tur iratu ngalap sane nenten tandur iratu.’
22 “Raris anake agung punika mabaos sapuniki,
‘Wih pengayah jaat!
Gelah bakal ngukum cai buka raos caine.
Cai suba nawang gelah mula anak gemes,
nyuang bati asil madagang anak lenan tur ngalapin ane tuara pamulan gelah.
23 Adi cai tusing ngejang pipis emas gelahe sid anake ane masilih-silihang pipis?
Apanga tatkala gelah teka,
gelah nerima pipis gelahe muah bungane.’
24 “Raris anake agung punika mabaos ring anake sane wenten irika sapuniki,
‘Jemak ja pipis emase ento,
tur baang ja anake ane ngasilang dasa keteng ento.’
25 “Nanging anake irika matur sapuniki,
‘Duh ratu,
ipun sampun madue dasa keteng jinah emas.’
26 “Irika raris anak agung punika mabaos sapuniki,
‘Gelah ngorahang ane saja:
Anake ane suba ngasilang bati bakal buin baanga,
sakewala anake ane tusing ngasilang bati,
apa ane gelahanga bakal kajuang.
27 Sakewala jani aba ja mai musuh-musuh gelahe ane tusing nyak nerima gelah dadi rajan iane.
Matiang ja ia makejang di arepan gelahe.’”
Hyang Yesus Kaagungang Ritatkala Nampek Kota Yerusalem
28 Sasampune Hyang Yesus ngamaosang sekancan paindikane punika,
irika raris Ida kairingin para sisian Idane nglanturang mamargi nuju Kota Yerusalem.
29 Kaceritayang mangkin,
ipun sami sampun nampek ring Desa Betpage lan Desa Betania sane wenten ring Bukit Saitun.
Irika raris Hyang Yesus nunden kalih diri sisian Idane
30 saha ngandika sapuniki,
“Luas ja ka desa ane di arepan ragane ento.
Yening ragane macelep ka desane ento,
ditu ragane bakal nepukin keledai ane nu nguda mategul.
Tur keledaine ento tusing taen kategakin anak.
Laut kelesang ja keledaine ento tur aba mai.
31 Yening ada anak ane matakon tekening ragane,
‘Napike mawinan ragane ngelesin keledaine punika?’
Masaut ja kene,
‘Sang Ratu Agung ngamerluang.’”
32 Raris makakalih pengiring Hyang Yesus punika luas,
tur napetang sekancan paindikan sane mamargi patut sekadi pengandikan Idane.
33 Ritatkala ipun ngelesang keledaine punika,
anake sane nuenang keledaine mabaos sapuniki,
“Napike mawinan ragane ngelesang keledaine punika?”
34 Irika ipun masaur sapuniki,
“Sang Ratu Agung ngamerluang.”
35 Raris ipun makakalih makta keledaine punika ring Hyang Yesus,
tur nagingin baju jubahnyane ring tundun keledaine.
Irika raris ipun nulungin Hyang Yesus munggah ka duur keledaine.
36 Risedek Hyang Yesus mamargi nganggen keledaine,
anake akeh pada ngebatang baju jubahnyane ring margine.
Gambar: Hyang Yesus Katerima ring Kota Yerusalem (19:36)
37 Duk Hyang Yesus nampek ring Kota Yerusalem,
ring margine sane nuunang saking Bukit Saitun,
makasami pengiring Idane sane akeh punika ngawitin ngagungang Sang Hyang Pengardi antuk suara keras.
Tur ipun sami ngaturang penyuksma ring Sang Hyang Pengardi krana sampun nyaksiang sekancan paindikan sane ngangobin.
38 Ipun sami masuryak sapuniki,
“Kaagungang ja Raja sane rauh dados utusan Sang Hyang Tunggal!”
Kidung 118:26.
“Sutrepti ring swarga,
tur kaagungang ja Sang Hyang Pengardi ring genah sane maha luhur!”
39 Irika raris saking anake akeh punika wenten para anak Parisine mabaos kapining Hyang Yesus sapuniki,
“Guru,
nikain ja para sisian Gurune mangda mendep.”
40 Irika raris Hyang Yesus nyaurin ipun sapuniki,
“Tiang ngandikayang sane patut!
Yening ipun sami mendep,
batu-batune puniki jagi masuryak.”
Hyang Yesus Nangisin Kota Yerusalem
41 Ritatkala Hyang Yesus ngancan nampek ring Kota Yerusalem tur nyingakin kotane punika,
Ida raris nangisin kotane punika.
42 Ida ngandika sapuniki,
“Amat ke melahne di dinane jani yening anake di Yerusalem nawang apa ane ngadakang kasutreptian buat ia makejang.
Sakewala jani paundukane ento kasilibang.
43 Bakal teka galahe,
musuh-musuh iane bakal ngwangun tembok ngiterin ia,
laut nesek ia uli maideh-idehan.
44 Tur musuh-musuh iane bakal ngamatiang wargane ditu lan ngenyagang makejang temboke,
kanti tusing ada batu ane matumpuk di duur batu ane lenan.
Sawireh warga Yerusaleme tusing ngrunguang galahe ritatkala utusan Sang Hyang Pengardi rauh mangda nylametang ia!”
Hyang Yesus Ngranjing ring Genah Agung Mabakti Kapining Sang Hyang Pengardi
45 Sasampune Hyang Yesus rauh ring Kota Yerusalem,
Ida ngranjing ka Genah Agung Mabakti kapining Sang Hyang Pengardi lan Ida ngulah anake sane maadolan irika.
Gambar: Hyang Yesus Ngulah Anake Sane Maadolan ring Genah Agung Mabaktine (19:45)
46 Hyang Yesus ngandika sapuniki,
“Wenten katulis ring Cakepan Sucine sapuniki,
‘Purin Sang Hyang Pengardine nenten tios genah buat mabakti.’
Yesaya 56:7.
Nanging ragane nadosang genah Idane satmaka ‘genah para malinge mengkeb.’” Yeremia 7:11.
47 Sebilang dina Ida ngajahin ring Genah Agung Mabakti kapining Sang Hyang Pengardi.
Duk punika,
para pemimpin rsi,
para guru agama Yahudine sareng para pemimpin Bangsa Yahudine meled ngamademang Hyang Yesus.
48 Nanging ipun nenten ngamolihang sekadi napi carane mangda mresidayang ngamademang Ida,
krana makasami anake setata ngiring Ida tur mirengin pengandikan Idane.